तस्करी हुँदै गरेको सुपारी बरामद्

तस्करी हुँदै गरेको सुपारी बरामद्
सर्लाही समाचारदाता
मलंगवा, फागुन १५ । भारततर्फ अवैध ढंगले निकासी हुँदै गरेको अवस्थामा प्रहरीले बुधबार मध्य राती तीन क्वीन्टल सुपारी बरामद् गरेको छ । सुपारी आयात एवं निर्यातमा तस्करी हुने गरेको भनेर मुकुककको सुदर पूर्वी काँकडभिट्टा नाका प्रचलित रहेपनि सर्लाहीको ग्रामीण नाकामा समेत तस्करी हुँदै गरेको अवस्थामा ठूलो परिमाणमा सुपारी बरामद् भएको हो । सर्लाहीका विभिन्न नाकाहरु समेत प्रयोग गरेर सुपारी भारततर्फ तस्करी हुने गरेको पछिल्लो घटनाले पुष्टी गरेको छ ।
बुधबार राती करिब एक बजे सदरमुकाम मलंगवाबाट पश्चिम पर्ने फेनहारा नाकाबाट भारत तर्फ तीन साइकलमा सुपारी लिएर जाँदै गरेको अवस्थामा प्रहरीले सुराकिको अधारमा पक्राउ गरेको हो । तीन वटा साइकलमा ५०÷५० किलो दरका बोरामा सुपारी निकासी हुँदै गरेको अवस्थामा प्रहरीले बरामद् गरेको थियो । फेनहारा नाकामा प्रहरीलाई देख्न साथ साइकल र सुपारी छोडेर सम्बद्ध अभियुक्तहरु फरार भएको प्रहरीले जनाएको छ । प्रमुख नाकाहरु प्रयोग गरेर ठुलो परिमाणमा सुपारी भारत लिएर जान नसके पछि सर्लाहीमा पुराना सइकलमा सुपारी तस्करी हुन थालेका जानकारहरुले बताएका छन् ।
सिमा नजिकको गाउमा गोदाम बनाएर साइकल, भरिया र कम परिमाणमा मध्यरतीमा सुपारी भारतीय भुमिमा ओसार्ने काम फस्टाएउदै गएको स्थानीय बासिन्दाले बताए । सुपारी तस्करीको सुचनाका अधारमा प्रहरीले ग्रामीण नाकामा निगरानि बढाएको जिल्ला प्रहरी कार्यालयले जनाएको छ । प्रहरी नायव निरीक्षक यज्ञनन्द साहको नेतृत्वमा खटिएको प्रहरीले सुपारी बरामद् गरेको थियोे ।
बुधबार मध्यराती पक्राउ परेको ५४ हजार मुल्य बराबरको ९ बोरा सुपारी र तीनवटा साइकल भन्सार कार्यालयमा बुझाइएको जिल्ला प्रहरी कार्यालय सर्लाहीले जनाएको छ ।